Maqedonia e Veriut pritet të formojë qeverinë e re pas zgjedhjeve të 15 korrikut dhe me shumë gjasa ajo do të përbëhet nga koalicioni i LSDM-PDSH i Zoran Zaev dhe BDI-ja e Ali Ahmetit. Ky i fundit kishte vënë si kusht kryeministrin shqiptar për të hyrë në negociata por një gjë e tillë duket se nuk do të ndodhë që nga fillimi i mandatit të qeverisë.
Gazetari dhe analisti Baton Haxhiu tha në një intervistë për ABC Neës se marrëveshja është për kryeministër shqiptar në vitin e fundit të mandatit. Siç thekson ai, e rëndësishme është që shqiptarët do të marrin zv.kryeministrin e parë, ministrin e Financave dhe atë të Jashtëm.
“Është LSDM, BDI dhe PDSH të tria partitë politike kanë arritur kuotën e 62 deputetëve për të marrë pëlqimin dhe për të votuar qeverinë. Qeveria ka disa risi. Besoj se kryetari i Kuvendit do tu takojë shqiptarëve. Natyrshëm që do i takojë për herë të parë edhe ministria e Financave dhe nënkryetari i parë i qeverisë. Që është një avancim i jashtëzakonshëm. Përpjekjet janë që viti i fundit ti takojë edhe kryeministrit që të jetë shqiptar, viti i katërt, besoj se ka një marrëveshje mes Zoran Zaev dhe palës shqiptare, por kjo nuk do të konfirmohet për shkak të natyrës së votimit. Ky model besoj se do të jetë i përmbyllur gjatë kësaj jave.
Nuk është me rëndësi viti, por ajo që të arrihet. Dhe kjo do të jetë një arritje për shqiptarët. E rëndësishme është që së pari të ndërtohet një qeveri dhe pastaj qeverisja me 4 vjet do të përfundojë në vitin e fundit me një kryeministër shqiptar. Unë mendoj se ambiciet për ta bërë kryeministrin shqiptar që në fillim do të bashkonte partitë maqedonase dhe do të krijonte një përplasje gati etnike të pakthyeshme.
Zv.kryeministri është një arritje dhe pastaj ministri i Financave, pasi qeveritë shqiptarë janë ankuar që buxheti shpërndahet në mënyrë të padrejtë dhe ministri i Jashtëm”, tha Haxhiu./ Opinion.al
