“Unë e di shumë mirë që koalicioni ka shumë mbështetës. Koalicioni duhet parë në dy nivele: në nivelin e përditshmërisë që patjetër që ka shumë e shumë probleme. Këtu flas në marrëdhëniet e administratës. Dhe në nivelin e qëllimit dhe objektivit afatgjatë. Nëse në rastin e parë ka shumë gjëra për të korrigjuar, ka jo pak gjëra për të kërkuar ndjesë për mënyrën se si ndërtohen marrëdhëniet me qytetarët, në nivelin strategjik koalicioni i ka bërë një shërbim të madh këtij vendi. Ky koalicion është garancia për reforma që po modernizojnë Shqipërinë”, u shpreh Rama në konferencën që zhvilloi në rrjetet sociale.
Lidhur me vazhdimësinë e këtij koalicioni, Rama tha: “Njerëzit e kërkojnë dhe e meritojnë një përgjigje. Së shpejti do ulemi në tryezën e koalicionit dhe do diskutojmë projektin e katër vjeçarit të ardhshëm. Do vendosim si do paraqitemi para shqiptarëve për mandatin tjetër. Sot koalicioni ka edhe një komponent të ri, që është PDIU. Është një diskutim i nevojshëm, duhet bërë serioz, por të gjithëve u them se ky koalicion në gjykimin e të përditshmes mund të ketë shumë gjëra për të rrudhur buzët, por në gjykimin e strategjikes është një koalicion që po transformon Shqipërinë”.
