Kandidati për kryetar të PD-së, Fatbardh Kadilli, në nisje të fushatës për zgjedhjen e kryetarit të kësaj force politike, u pyet nëse do ta përjashtonte ish-kryeministrin Berisha nga grupi parlamentar i Partisë Demokratike, nëse bëhet kryetar i partisë, pas shpalljes non grata nga SHBA.
Kadilli theksoi se ish-kryeministri Berisha është institucion më vete. Ai shtoi se Berisha e vendos vetë distancën mes tij dhe PD-së, si të jetë më e shëndetshme për Partinë Demokratike.
“Unë flas për PD të përbashkuar, nuk ka PD që përjashton. Berisha është institucion, nuk është deputet. Është vetë zoti Berisha që vendos distancën e shëndetshme mes institucionit mes PD-së dhe tij, e them këtë duke pasur parasysh se përse e bëni pyetjen”, tha Kadilli.
Më tej Fatbardh Kadilli foli edhe për platformën e tij politike, duke thënë se synon të ndryshojë PD duke e shndërruar në një lëvizje popullore që frymëzon shoqërinë.
“Jam deklaruar për një PD të pastër. Nuk duhet të kemi forum rinor sa për sipërfaqe. Unë jam për një PD fituese, jam për PD që shndërrohet në lëvizje popullore dhe frymëzon shoqërinë, një forcë politike që ka lidhje të shkurtër me qytetarin. Unë dua të zgjoj individin politik, duhet të jetë forcë politike që nuk zhgënjen, që ka raporte të mira me mediat, në mbrojtje të orientimit perëndimor, duke garantuar hapësirë për çdo individ, që garanton zhvillim të kauzave, zhvillim karriere. Unë jam për një PD të vërtetë. Jam për një PD që ka të njëjtin standard si për veten edhe për kundërshtarin, PD që do drejtoj do të rishikojë ndarjen administrative. Duhet të sfidojmë modelin okupues të partisë, i qëndroj parimeve të mia në vlerat e konservatorizmit modern. Jemi në një garë e unë kam vizionin më të qartë për drejtimin e partisë, për të ardhmen e ndritur të PD-së”, u shpreh Kadilli.
