Ish-komando të ushtrisë shqiptare dyshohet se janë bërë pjesë e celulave xhihadiste në Siri. Nga hetimet për imamët e vetëshpallur të Unazës së Re rezulton se celula e drejtuar nga Genci Balla ka rekrutuar jo vetëm qytetarë, por dhe ish-ushtarakë.
Kështu, ka dyshime se ish-imami i xhamisë së Leshnicës në Pogradec Almir Daci, ka rekrutuar ish ushtarakun Erjon Alinj. Në dokumentet e prokurorisë thuhet se Alinj, në shkurt të 2013 ka qëndruar për disa ditë në xhaminë e Unazës së Re, xhami kjo e drejtuar nga Genci Balla (tani në burg).
Nga përgjimi i telefonatave, Alinj njofton vëllain Edin se ka ikur jashtë në Gjermani, por në një tjetër telefonatë me të shoqen ai tregon se ndodhet në Turqi.
Alinj nuk është i vetmi komando i rekrutuar për luftën e shenjtë, pasi në materialin hetimorë flitet dhe për ish-Komandon Lavdërim Perleka të identifikuar në një foto ku është analizuar vdekja e shqiptarit Diamant Rrasha, nga Tirana. /shqiptarja.com/
