Kryetari i Partisë Demokratike ka dhënë një intervistë për gazetën italiane “Il fatto quotidiano”. Në intervistën për gazetarin Giancarlo Padovan, Lulzim Basha sqaron sipas tij situatën në Shqipëri, ku thotë se protestave të opozitës qeveria i përgjigjet me gaz lotsjellës.
“Ekzistojnë pamje që tregojnë sesi gazi lotsjellës është përdorur në mënyrë të qëllimshme nga forcat policore për të dëmtuar protestuesit”, thotë Basha.
Gazetari e ka pyetur nëse rreshtimi përkrah me LSI-në, një parti që ka ndarë për katër vite pushtetin me Partinë Socialiste, i heq besueshmërinë kauzës së demokratëve. Basha nuk i është përgjigjur drejtpërdrejtë kësaj pyetjeje, duke thënë se qëllimi i vetëm është largimi i Ramës.
“Pozicioni ynë është i qartë. Çdo qytetar, organizatë a formacion politik që ka si objektiv të vetin çlirimin e vendit nga droga dhe krimi i organizuar është i mirëpritur të bëhet pjesë e frontit të bashkuar opozitar. Rama ka qenë ministër qysh më 1998-n, është lider i Partisë Socialiste prej 14 vitesh dhe shef i qeverisë prej 6 vitesh. Nën qeverisjen e tij, Shqipëria u shndërrua në një parajsë për trafikimin e drogës dhe pastrimin e parave të pista”, është shprehur ai.
Kryetari i PD-së është shprehur se nuk bëhet fjalë për një betejë për pushtet, por për më shumë drejtësi dhe qeverisje për qytetarët. Basha ka thënë se sipas sondazheve, PD ka mbështetjen e shumicës së qytetarëve./Opinion.al
