Prodhimi global i kokainës ka arritur nivele rekord me rikthimin e kërkesës pas bllokimeve për shkak të Covid-19, sipas një raporti të ri të OKB-së.
Zyra e OKB-së për Drogën dhe Krimin tha se kultivimi i kokainës u rrit me 35% midis 2021 dhe 2022 në nivele rekord. Gjetjet sugjerojnë se qendra të reja për trafikim janë shfaqur në Afrikën Perëndimore dhe Qendrore.
Raporti nënvizon gjithashtu se trafikantët po përdornin më shpesh shërbimet postare ndërkombëtare për të çuar drogën te konsumatorët.
Evropa dhe Amerika e Veriut janë tregjet më të mëdha për kokainën, e ndjekur nga Amerika e Jugut dhe Qendrore dhe Karaibet.
Në këtë raport global për Kokainën theksohet se rritja e prodhimit ishte rezultat i një zgjerimi në kultivimin e bimëve të kokainës, si dhe përmirësimeve në konvertimin e tyre në kokainë pluhur.
Në raport përmenden në mënyrë të vazhdueshme edhe grupet kriminale ballkanike dhe ato shqiptare që cilësohen leva të gjera të rrjeteve ndërkombëtare që orkestrojnë importimin e kokainës në Itali.
“Nga Holanda shpërndahet kokaina drejt vendeve të tjera evropiane dhe bandat shqipfolëse duket se luajnë një rol të rëndësishëm në këtë, sidomos në trafikimin drejt Shqipërisë dhe Italinë. Një destinacion tjetër i rëndësishme është ai i Mbretërisë së Bashkuar, ku është vlerësuar se grupet shqipfolëse të ushtrojnë kontroll të konsiderueshëm në treg.
Kokaina arrin në Itali edhe nga vende të tjera evropiane, përfshirë Holandën dhe Spanjën. Ndërsa krimi i organizuar italian veçanërisht Ndrangheta, Camorra, por edhe grupet shqipfolëse, leva të gjera të rrjeteve ndërkombëtare orkestrojnë importimin e kokainës në Itali, ndonjëherë duke punuar në bashkëpunim”-thuhet në raport./Opinion.al
