Seanca plenare e ditës së sotme ka nisur me debate në Kuvend. Opozita kërkon që të lirohet nga burgu nëna që u arrestua 8 ditë pasi solli në jetë fëmijën e saj. Gruaja nga fshati Drisht i Postribës në Shkodër, u vu në pranga për një gjobë të vitit 2020, pasi ishte akuzuar nga bashkëshorti për braktisjen e vajzës nga martesa e parë.
Deputetja e PD-së, Dhurata Çupi është shprehur se duhej patjetër një debat me ministrin e Drejtësisë për këtë çështje.
“Është një ngjarje e rëndë, e dhimbshme , e rënde, dëshpëruese. Ne këtu duhet të kemi një seancë debati për ngjarjen e gruas lehonë në Shkodër që u arrestua. Ne duhet të kemi një diskutim me ministrin e Drejtësisë. S’duhet të ketë asnjë seancë tjetër përpos kësaj. Drejtësia është e padrejtë me njerëzit e thjeshtë. Këtu para disa ditësh s’ngeli deptet pa uruar 8 marsin për like dhe sot s’ka asnjë reagim. Kështu duhet të niste sot seanca plenare.”- tha Çupi.
Sakaq, Vokshi në fjalën e saj ka thënë se çështja për dhunën në familje duhet të kishte marrë vëmendjen kryesore në seancën e sotme.
“U kërkua të merret informacion për çështjen. Nikolla ka sjellë një amendim ligji për dhunën në familje dhe ai ligj duhet të ishte diskutuar sot. Ligji që na ka sjellë nuk merr asnjë masë. Përse ndodh dhuna në familje, ne kemi një kryeministër të dhunshëm”, ka thënë Vokshi.
Kujtojmë se Diana Bahçja u arrestua nga policia e Shkodrës duke e shkëputur nga djali i saj vetëm 8 ditësh pasi gjykata e shkallës së parë në Tiranë i ka vendosur një gjobë në vitin 2020 prej 2 milionë e 500 mijë lekë të vjetër duke ia konvertuar një javë më parë, pra pas tre vitesh me burg një muaj e 20 ditë.
