Ambasadori amerikan në Kosovë, Jeffrey Hovenier ka thënë se plani i Bashkimit Europian për normalizimin e marrëdhënieve Kosovë-Serbi sjell përfitime reale, praktike, politike dhe ekonomike.
“Palët e kanë pranuar e për zbatimin do të diskutohet në fundjavë. Më duhet të jem i qartë, SHBA-të vlerësojnë se në këtë moment, nuk ka marrëveshje më të mirë në dispozicion. Ky është një hap i rëndësishëm përpara. Fokusi kryesor duhet të jetë te zbatimi i suksesshëm dhe efektiv i planit. Nëse Kosova kontribuon në mënyrë konstruktive në këtë drejtim, SHBA-të do t’i ripërtërijnë përpjekjet për ta ndihmuar vendin që t’i bashkohet Partneritetit të NATO-s për Paqe”, thotë ambasadori.
I pyetur nëse ka ndonjë ndryshim në pozicionin amerikan sa i përket marrëveshjes së detyrueshme mes Kosovës dhe Serbisë, Hovenier foli për “njohje të realitetit”.
“Pozicioni amerikan ka qenë dhe do të jetë i qartë, nuk ndryshon. Por, duhet të kemi parasysh momentin në të cilin jemi. Mendoj se për arsye të ndryshme, por kryesisht për shkak të vendimit të marrë nga udhëheqja në Serbi, gjasat për arritjen e njohjes reciproke tani, nuk janë shumë të mëdha.
Tani është e rëndësishme të ketë një ripozicionim të marrëdhënieve Kosovë-Serbi që do t’i kontribuonte stabilitetit rajonal e do t’i mundësonte Kosovës të ecë përpara në shumë mënyra”, ka thënë ai. /Opinion.al
