Janë zbardhur detaje të reja lidhur me arrestimin e efektivit te RENEA-s Altin Morina. Sipas “Report Tv”, dy orë para së të arrestohej Morina ishte në Elbasan ku dyshohet se ka dorëzuar shuma parash tek persona te skeduar nga Policia.
113 mijë eurot e sekuestruara në makinën tip “Audi” luksoz janë të efektivit edhe pse nuk ka deklaruar asgjë para kolegëve te tij pas arrestimit në zonën e Kodrës së Diellit në Tiranë.
Pak minuta para se të prangosej është vëzhguar nga Forcat Operacionale se ndodhej në mjet me një zyrtar të lartë të një agjencie ligjzbatuese, identiteti i të cilit nuk bëhet publik nga hetuesit për shkak të sekretit hetimor dhe nuk dihet arsyeja pse efektivi nuk është ndaluar në momentin që ishte me të.
Efektivi Morina dyshohet si i përfshirë në trafikun e drogës me grupet kriminale në Tiranë, Shkodër dhe Elbasan.
Altin Morina dyshohet se ka lidhje edhe me Kreshnik Halilajn që u arrestua më herët për arsenal armësh dhe drogë. Në këtë rast efektivi dyshohet se ka fshehur prova duke thënë se kokaina e gjetur në shtëpinë e Halilajt nuk ishte kokainë, por miell buke.
Ndër të tjera ka dyshime të forta se ka lidhje edhe me grupin e Ervis Martinajt. Para 8 ditësh është parë në praninë e një të afërmi të Martinajt të cilin e mbronte nga ndonjë atentat i mundshëm.
