18 pemë të llojeve të ndryshme iu shtuan kryeqytetit si simbolikë e 8 Marsit. Aksionit të mbjelljes iu bashkua kryebashkiaku Erion Veliaj, i cili ftoi qytetarët të mbjellin pemë në festa të caktuara.
“Gratë dhe vajzat e Tiranës, jo vetëm mbajnë familjet tona edhe në ditët e vështira të tërmetit e pandemisë, jo vetëm sigurohen që janë pjesa më vitale, më e disiplinuar, më produktive e administratave tona, si në bashki, si në qeveri, por janë jashtëzakonisht aktive edhe në sektorin privat, si drejtuese.”
Përveç liqenit të Tiranës, kryebashkiaku tha se ka plot hapësira për të mbjellë pemë.
“Një hapësirë tjetër për të mbjellë pemë, kush ka nevojë për ide, është Parku i Liqenit të Farkës. Është mushkëria e dytë e Tiranës, të cilin po e gjelbërojmë, po vendosim disa pista të vrapit, të ecjes me biçikletë. Sigurisht, këto do jenë dy parqet më të mëdha dhe sigurisht parku i Farkës na mundëson që Njësia 1 dhe Njësia 2, Mulleti, Farka, Shkoza, Dajti, të ‘shkarkojë’ atje dhe të ulet edhe pak fluksi që kemi këtu në parkun e Liqenit të Tiranës.”
Veliaj i ftoi të gjithë që të shfrytëzojnë stinën për të kontribuar në gjelbërimin e Tiranës.
