Kryetari i Partisë Demokratike, Sali Berisha ka takuar mësuesit në rastin e ‘7 Marsit, ku u shpreh se mësuesit kanë rolin më thelbësor në formimin e një kombi.
Kryedemokrati ka deklaruar se në 9 vite janë mbyllur 760 shkolla dhe është reduktuar numrit të mësuesve.
Kreu i PD-së tha se 9 vite më parë pagat ishin më të larta në rajon, dhe në një hark kohor janë ndërtuar mbi 1300 kopshte dhe institucione të tjera të arsimit duke pasur internet dhe duke u përpjekur për modernizim të mësimdhënies.
“Kjo qeveri ka kryer një gjenocid të vërtetë ndaj shqiptarëve me krijimin e kushteve për shpopullimin e vendit. Janë mbyllur 760 shkolla, është reduktuar në mënyrë të frikshme numri i mësuesve. Mësuesit shqiptarë sot paguhen dy herë më pak se mësuesit në Kosovë, Mal të Zi dhe se mësuesit në çdo vend të rajonit.
9 vite më parë ata kishin pagat më të larta në rajon. U bë një përpjekje e madhe për të ngritur një infrastrukturë moderne arsimore. U ndërtuan në një hark kohor 8-vjeçar mbi 1300 shkolla, kopshte dhe institucione të tjera të arsimit. U shtri interneti në çdo shkollë, u bënë përpjeke të mëdha për modernizimin e mësimdhënies. Shqipëria pati ngjitje vertikale në sistemin e Pizas. Sigurisht që ishte larg pozicionit që do të donim, por ngjitja ishte vertikale dhe kjo ishte meritë e mësuesve tanë.
Universitetet u shndërruan në universitete të dyerve të hapura për fëmijët e shqiptarëve”, ka thënë Berisha
