Kreu i PD, Sali Berisha, deklaroi në protestën e sotme se Taulant Balla gjatë seancës në Kuvend njoftoi vendimin që do japë gjykata me datë 3 Mars.
Berisha u betua para burrave të pranishëm në protestë se Rama dhe Balla do të bëhen përgjegjës personal për çdo akt armiqësor ndaj PD-së dhe opozitës shqiptare.
“Sot Taulant Balla njoftoi vendimin që do japë gjykata me datë 3, unë i them meqenëse ti je i pari që njoftove vendimin, të betohem para këtyre burrave, se ti dhe Edi Rama do bëheni përgjegjës personal për çdo akt armiqësor ndaj PD-së dhe opozitës shqiptare.
Kudo që të fshihesh, në çdo vrimë miu, do të kapim dhe do të çojmë te Gentian Sharra. Për këtë Edi Rama dhe ti do jeni përgjegjës personalë. Për tre minuta, jemi brenda në parlament. Prandaj ikni. Po vendosëm, jemi në sallë! Po vendosëm, jemi në sallë, asgjë nuk na pengon! 3 marsi është dita e madhe, 3 marsi është ditë fitoreje për revolucionin. 3 marsi është dita e çdo shqiptari, është dita në të cilën bëjmë betejën për të sotmen dhe të ardhmen tonë, dhe njëherë ju përshëndes shumë përzemërsisht, ta vazhdojmë betejën tonë. Në çdo rast, marshi drejt Surrelit, do jetë marshi ynë”-tha Berisha.
Balla gjatë fjalës së tij në Kuvend tha: Jam shumë i sigurtë që pas datë 3 nuk do jeni më këtu se gjykata do marë vendim, por ajo që ka rëndësi është që problemet e brendshme të partisë tuaj të mos i sillni në sallën e Kuvendit.
