Sekretari i Përgjithshëm i NATO-s, Jens Stoltenberg ka thënë se vendimi i Rusisë për të pezulluar pjesëmarrjen në traktatin e fundit dypalësh të kontrollit të armëve bërthamore START e bëri botën një vend më të rrezikshëm dhe i kërkoi Moskës ta rishqyrtojë.
Në një konferencë shtypi të mbajtur në selinë e NATO-s në Bruksel ai foli pasi presidenti rus Vladimir Putin i dha një paralajmërim Perëndimit për luftën në Ukrainë dhe njoftoi vendimin e tij për traktatin e ri START.
Traktati midis Moskës dhe Uashingtonit, i nënshkruar në vitin 2010, kufizon numrin e kokave bërthamore që mund të vendosin dy fuqitë më të mëdha bërthamore në botë dhe do të skadojë në vitin 2026.
“Më shumë armë bërthamore dhe më pak kontroll i armëve e bëjnë botën më të rrezikshme,” u tha gazetarëve Stoltenberg, duke qëndruar përkrah ministrit të Jashtëm ukrainas Dmytro Kuleba dhe shefit të politikës së jashtme të BE-së, Josep Borrell.
Duke iu përgjigjur akuzave të Putinit se Perëndimi po përpiqej të shkatërronte Rusinë, Stoltenberg tha se Moska ishte agresori në Ukrainë ku nisi një pushtim pothuajse një vit më parë.
“Është Presidenti Putin ai që filloi këtë luftë perandorake pushtuese … Siç e bëri të qartë Putin sot, ai po përgatitet për më shumë luftë. Putini nuk duhet të fitojë. Do të ishte e rrezikshme për sigurinë tonë dhe të gjithë botën.” shtoi Stoltenberg.
“Më vjen keq për vendimin e Rusisë për të pezulluar pjesëmarrjen e saj në programin e ri START”.
Sekretari amerikan i Shtetit Antony Blinken tha sot në Athinë se vendimi i Rusisë ishte i papërgjegjshëm dhe Shtetet e Bashkuara do të vëzhgonin me kujdes për të parë se çfarë bën në të vërtetë Moska.
