Emri/ I akuzuar për kultivim kanabisi, ekstradohet nga Italia 31-vjeçari shkodran

Një 31-vjeçar, i shpallur në kërkim ndërkombëtar, është ekstraduar nga Italia drejt Shqipërisë.
Bëhet fjalë për Gjon Kodraj, i akuzuar për kultivimin e rreth 1100 bimëve kanabis, në një fshat të Shkodrës.
“Në kuadër të bashkëpunimit mes Interpol Tiranës dhe Interpol Romës, për kapjen e shtetasve në kërkim ndërkombëtar që fshihen në këto dy vende dhe ekstradimin e tyre në vendin ku ata kanë kryer veprën/veprat penale, është ekstraduar nga Italia drejt Shqipërisë, shtetasi Gj. K., 31 vjeç, banues në Shkodër.
Gjykata e Rrethit Gjyqësor Shkodër i ka caktuar 31-vjeçarit, masën e sigurisë “Arrest në burg”, për veprën penale “Kultivimi i bimëve narkotike”, kryer në bashkëpunim”-njofton policia.
31-vjeçari në bashkëpunim me shtetas të tjerë, në vitin 2016 ka kultivuar në territorin e fshatit Pult, Shkodër, rreth 1100 bimë narkotike kanabis, të cilat janë gjetur dhe asgjësuar nga Policia, gjatë kontrollit të territorit të këtij fshati.