Mediat në Kinë kanë shkruar për vizitën e papritur të Presidentit të SHBA Joe Biden në Ukrainë.
Edhe pse mungon një përgjigje zyrtare, Partia Komuniste ka vendosur që reagimi të kalojë nga mediat e kontrolluara nga regjimi.
Reagimi në fjalë vjen nga Global Times, versioni anglisht i Gazetës së Popullit, organit zyrtar të Partisë Komuniste Kineze.
Gazeta e cilëson vendimin e kreut të Shtëpisë së Bardhë si “ irracional dhe egoist”, ndërkohë që sipas analistëve kinezë të kontaktuar, “vizita tregon synimin e SHBA për të përfituar nga konflikti, pa u shqetësuar nga fakti se vizita mund të shkaktojë një kundërpërgjigje edhe më agresive nga ana e Rusisë”.
Artikulli vijon duke evidentuar sinjale që shkojnë drejt një përkeqësimi të situatës, dhe kjo sepse sipas tyre “Biden po shtyn Ukrainën të veprojë si një ushtar i bindur për të mundur Rusinë, por objektivi është shumë i rrezikshëm, dhe sipas profesorit Kinez Li Haidong, i cituar nga artikulli, “Uashingtoni po i hedh benzinë zjarrit të një situate të tensionuar, ndërkohë që konflikti ende mund të dalë jashtë kontrollit”.
Nga fillimi i konfliktit në shkurtin e kaluar, Pekini ka mbajtur zyrtarisht një qëndrim neutral, duke kritikuar SHBA për qasjen e saj ndaj Ukrainës, por duke refuzuar të mbështesë zyrtarisht Moskën, ose ta furnizojë atë me armë.
Ndër muaj, gjithsesi, dyshimet se Kina po furnizon ilegalisht Rusinë me ushqime dhe materiale teknologjike që shkojnë ndesh sanksioneve perëndimore janë bërë gjithmonë e më të forta.
Shtetet e Bashkuara janë të shqetësuara tashmë se Kina po konsideron të mbështesë edhe ushtarakisht Moskën, duke i mundësuar “armatime vdekjeprurëse” siç ka pohuar vetë sekretari i Shtetit Blinken. Presidenti kinez, Xi Jinping, pritet të kryejë një vizitë zyrtare në Moskë, pranverën e ardhshme.
