Në mbledhjen e kryesisë së PD, kreu i selisë blu, Sali Berisha, u ndal kryesisht te çështja e ish-zyrtarit të FBI “McGonigal”, që është duke u hetuar nga drejtësia në SHBA edhe për lidhjet tij me Shqipërinë.
Berisha ndër të tjera iu bëri thirrje qytetarëve shqiptarë që të ngrihen në protesta të fuqishme.
“Ndaj dhe ju bëj thirrje qytetarëve shqiptarë, të ngrihemi në protesta të fuqishme. Asnjë shqiptar, që është sot në Shqipëri dhe kudo që ndodhet në botë, shqiptar i vërtetë, asnjë shqiptar që ka jetuar në këtë vend që kur është shpallur pavarësia nuk meriton kurrë një kryeministër si ky që nuk ka asnjë parim, as flamur, as nder, as ideal, as gjë prej gjëje, përveç interesit të tij të ngushtë karriges së tij të ngushtë”, u shpreh Berisha.
Kryedemokrati iu drejtua edhe anëtarëve të kryesisë të cilëve u kërkoi që të bëhet gjithçka për mobilizimin e shqiptarëve.
“Ndaj dhe mendoj që ne duhet të bëjmë gjithçka për mobilizimin e shqiptarëve në një përgjigje përfundimtare të merituar. Edi Rama duhet të largohet menjëherë nga pushteti. Nuk ka dhe nuk mund të ketë paqe dhe stabilitet me një njeri që jo vetëm shkelmon çdo ditë mbi liritë dhe dinjitetin e shqiptarëve, me një njeri që vjedh çdo ditë fondet, pasuritë publike të tyre, me një njeri, i cili arrin në përmasa makbethiane të rekrutojë për qëllime të karriges dhe pushtetit të tij për të shkatërruar opozitën, pluralizmin, një nga njerëzit më të rëndësishëm të kësaj toke në fushën e sigurisë”, u shpreh Berisha.
