Një ngjarje e rëndë ka ndodhur në një shtëpi të moshuarve në Pejë të Kosovës.
Në një video të publikuar në rrjetet sociale, shihen disa punonjëse të këtij institucioni që shikojnë teksa një prej tyre dhunon të moshuarën. Po ashtu, një nga punonjëset filmon me telefon të gjithë ngjarjen, teksa dëgjohet që qesh.
Një pamje e tillë ka sjellë indinjatë në opinionin publik, e për pasojë qytetarët u kanë bërë thirrje autoriteteve që të ndërmarrin masa.
Pas publikimit të pamjeve të rënda, Policia e Pejës ka konfirmuar arrestimin e dy punonjëseve për rrahjen brutale të të moshuarës në Pejë. Bëhet fjalë për punonjësen që ka dhunuar të moshuarën si edhe personin që ka filmuar.
“Arrestohen dy (2) persona tё dyshuar Pejë, 2 nëntor 2022. Policia e Kosovës, Stacioni Policor nё Pejё, duke u bazuar nё video incizimin i cili ka qarkulluar nё media sociale, ku shihet njё punёtore nё njё shtёpi tё pleqve nё Pejё, e cila ёshtё duke ushtruar dhunё ndaj njё të moshuare. Policia menjёherё ёshtё vёnё në veprim dhe rreth orёs 14:10, ka identifikuar lokacionin dhe ka arrestuar dy (2) tё dyshuara lidhur me rastin. Tё dyshuarat janё duke u intervistuar nga hetuesit e Stacionit Policor nё Pejё dhe nё koordimin tё plotё me prokurorin e shtetit do tё merren veprime të mëtutjeshme”, njofton policia./ Opinion.al
