“I çova në park dje në mëngjes dhe tani s’janë më, janë larguar… “. Me dorën që i dridhet dhe sytë e skuqur nga dhimbja, Ardian Hyseni tregon celularin ku shfaqen fotot dhe videot e fëmijëve të tij.
Ardian Hyseni babai i 3 fëmijëve që humbën jetën në aksidentin tragjik në Reggio Emilia në Itali, ka folur për mediat italiane.
Pas ngjarjes së rëndë tashmë ai nuk ka guxim as të kthehet drejt shtëpisë ku u përplas makina, në të cilën udhëtonin fëmijët e tij dhe i kthen asaj shpinën.
“Vajza ime Shane insistoi aq shumë sa më tha: “Babi po vij të marr Resatin dhe Rejanën sonte, vishni mirë, do t’i marrim me vete për darkë”. Ata shkuan të hanin sushi në një restorant japonez në Reggio Emilia. Isha i qetë, aq sa më kishte zënë gjumi në shtëpi. Pastaj befas, pas orës 8, më thirri policia bashkiake”-rrëfen ai.
Bashkë me gruan, Anjezën shkuan drejt vendit të ngjarjes. Aty e gjithë bota u ra mbi kokë. Anjeza nuk e përballoi dot lajmin e zi. Ajo ra menjëherë në tokë dhe për pasojë u dërgua në spital.
“Një tragjedi pa shpjegim”, thotë Ardiani. Por ai nuk është vetëm. Për të qenë pranë tij në mengjes, kanë mbërritur disa të afërm nga Vicenza. “Ka diçka të çuditshme në këtë dinamikë të aksidentit”, thonë ata.
Ata bëjnë fotografi dhe kërkojnë me dëshpërim një arsye. “Por këtu nuk ka kamera? Do të donim ta kuptonim”, thonë të afërmit teksa pyesin banorët e zonës .
Prej disa kohësh banorët vendas kanë kërkuar përmirësime të rrugës. Diskutime që nuk pretendojnë t’ia lehtësojnë dhimbjen një familjeje të tërë.
“Shane ishte një vajzë e mrekullueshme. Resat dhe Rejana dy fëmijë spektakolarë, inteligjentë dhe të sjellshëm. Ne jemi pa fjalë”, thotë tezja e tyre.
Në vendin e ngjarjes kanë shkuar të afërm të tjerë të cilët ngushëllojnë Ardianin. Por celulari i tij bie ende. Është djali tjetër, i vetmi që i ka mbetur.
“Është i fundit që më ka mbetur, jeton në Francë – thotë Ardiani – Ka disa vite që jetojmë pranë Parmës, punoj si murator, por kemi kohë që jemi në Itali”.
Familja Hyseni, si shumë bashkatdhetarë, emigruan vite më parë nga Shqipëria, nga qyteti i tyre i bukur Durrësit, drejt Italisë në kërkim të një jete më të mirë.
