Kreu i Partisë Demokratike, Sali Berisha, u pyet nga gazetarët në konferencën e sotme për mediat, nëse ka patur pazare në negociatat mes Gazment Bardhit dhe Edi Palokës, për bashkimin e PD dhe daljen me kandidat të përbashkët në zgjedhjet vendore të vitit 2023.
Berisha u përgjigj se nuk ka dijeni për lajmet e qarkulluara se Bardhi ka kërkuar 20 bashki, ndërsa shtoi se bisedimet janë të sinqerta.
“Nëse ky grup vendos të krijojë fraksion nuk më merr leje mua, ai krijon fraksionin. E them këtë për të qartësuar se rrugët janë të hapura. Varet prej tyre, kanë mendime të ndryshme”, tha Berisha ne konference me gazetaret.
Pyetje: Kolegu tha se zoti Bardhi ka kërkuar 20 bashki në këto negociata, për ta kuptuar më qartë a ka kërkuar pazar zoti Bardhi në këto negociata?
Berisha: Nuk e kam dëgjuar një gjë të tillë, nuk kam asnjë dijeni, janë takuar dje, do takohen dhe të dy kanë bërë deklarata se po shkohet drejt një pozitiviteti. PD ka statutin e vet dhe jashtë statutit nuk mund të dalë. Ata janë anëtarë dhe deputetë të PD dhe bisedimet janë absolutisht të sinqerta. Nuk bëjmë ne bisedime me prapamendime.
Pyetje: Ju jeni për një bashkim total, apo për thjesht për të dalë me kandidat të përbashkët në zgjedhjet lokale?
Berisha: Dyert janë të hapura si për bashkim të plotë, si për fraksion. Ne kemi një nen, nenin që lejojmë fraksionet. Nëse ky grup vendos të krijojë fraksion nuk më merr leje mua, ai krijon fraksionin. E them këtë për të qartësuar se rrugët janë të hapura. Varet prej tyre, kanë mendime të ndryshme.
