Kreu i Partisë Demokratike, Sali Berisha në konferencën e përjavshme me gazetarët ka reaguar sërish për vdekjen e 32-vjeçarit Lear Kurti mbrëmjen e së mërkurës, pas shoqërimit nga efektivët e komisariatit numër 3 në Tiranë.
Berisha hodhi akuza ndaj uniformave blu se kanë falsifikuar dhe deformuar çdo të dhënë në lidhje me ngjarjen. Sipas Berishës, policia në kundërshtim absolut me praktikën e hetimit, ndërmori autopsinë sikur të ishin klandestinë. Kryedemokrati tha se që një autopsi të japë rezultatin e pritshëm, duhet lënë të paktën 12 orë.
“Gjithçka u bë po kaq e shëmtuar sa krimi. U vërsulën kriminelë të tjerë me uniformë, me në krye Ardi Veliun, për të falsifikuar dhe deformuar çdo të dhënë. Njoftuan se të riun e dërguan në spital në gjendje të rëndë dhe ndërroi jetë në spital. Ndërkohë që e dërguan kufomë, e dërguan të vdekur në spital. Dhe u përgënjeshtruan nga spital menjëherë. Në kundërshtim absolut me praktikën e hetimit, ndërmorën autopsinë sikur të ishin klandestinë, në ora 4 të mëngjesit. E palejueshme për një akt autopsie, sidomos kur thua për vdekje natyrale. Që një autopsi të japë rezultatin e pritshëm, duhet lënë të paktën 12 orë. Kur vdes një 32-vjeçar, që është subjekt i një hetimi, autopsia bëhet nga grup ekspertësh dhe jo nga një ekspert i vetëm nën terrorin e Ardi Veliut. Jo një ekspert i vetëm.:, u shpreh Berisha.
Më tej Berisha tha se ka të dhëna për keqtrajtim brutal dhe terror ndaj 32-vjeçarit.
“Një 32-vjeçari iu mor shpirti nga patrulla e Policisë së Shtetit. Lear Kurti po kthehej në banesën e tij, iu kërkua të ndalonte dhe e besueshme, ajo që thotë policia, se nuk ndaloi. Por Lear Kurti nuk ishte i armatosur. Lear Kurti nuk po kryente asnjë vepër flagrante. Në vendin ku u ndalua dhe në të gjithë zonën, kishte kamera të panumërta, me të cilat mund të identifikohej pa asnjë vështirësi. Por pavarësisht nga këto, patrulla e policisë u vërsul drejt tij, e ndoqi dhe si përfundim e çoi të vdekur në komisariat. Sipas të dhënave nga një keqtrajtim brutal dhe terror i vërtetë ndaj tij. Asnjë rregull nuk është respektuar në hetimin e kësaj vrasje. Në hetimin e kësaj barbarie ndaj një njeriu. Të supozojmë se këtij i ndaloi zemra vërtet, por për të faktuar këtë gjë, duhej korrektesa absolute në çdo hap. Nuk vdes natyralisht një i ri 32-vjeçar. Ka injorancë të kriminelëve që shpallin një gjë të tillë. Është përjashtim i të gjitha përjashtimeve”, tha Berisha./Opinion.al
