Teksa ka prezantuar prioritetet për sesionin e ri parlamentar, Enkelejd Alibeaj në një konferencë për mediat nga Kryesia e Kuvendit deklaroi se nesër grupi i PD-së do të dorëzojë në Gjykatën Kushtetuese një kërkesë për të shfuqizuar Bordin e Transparencës.
Alibeaj tha se Shqipëria mbetet në krye të listës së vendeve me çmimin më të lartë të hidrokarbureve, ndërsa Bordin e Transparencës e cilësoi si Klubi i Oligarkëve, që sipas tij ka shërbyer si një mekanizëm korruptiv për të deformuar tregun në dëm të interesit të qytetarëve.
“Shqipëria mbetet në krye të listës së vendeve me çmimin më të lartë të hidrokarbureve. Kjo jo vetëm për shkak të nivelit të lartë të taksave, mungesës së reagimit nga qeveria, por edhe për faktin se Shqipëria është nga të vetmet vende ku çmimi i naftës, benzinës apo gazit, paracaktohet nga Klubi i Oligarkëve, që qeveria e ka emërtuar si Bordin e kontrollit të çmimeve. Gjatë gjithë këtyre muajve, Klubi i Oligarkëve jo vetëm nuk ka mbajtur nën kontroll cmimet e naftës, benzinës apo gazit, por ka shërbyer si një mekanizëm korruptiv për të deformuar tregun në dëm të interesit të qytetarëve. Për këtë arsye, dua të informoj opinionin publik se Grupi Parlamentar i Partisë Demokratike, ka përgatitur dhe ditën e nesërme do të depozitojë në Gjykatën Kushtetuese, kërkesën për shfuqizimin si antikushtetues të dy ligjeve mbi bazën e të cilave funksionon Bordi i paracaktimit të cmimit të naftës, benzinës dhe gazit”, u shpreh Alibeaj.
