Është hapur provizorisht për qarkullim segmenti rrugor Palasë-Dhërmi, ndërsa do të jetë plotësisht gati në fillim të sezonit të ardhshëm veror. Punimet për këtë rrugë nisën një vit më parë.
Zëvendëskryeministrja Belinda Balluku dhe njëkohësisht ministre e Infrastrukturës dhe Energjisë, gjatë inspektimit të rrugës, tha se tashmë të gjithë ata që duan të vizitojnë Dhërmiun mund të përdorin këtë rrugë.
“Hapja e këtij aksi do të ndihmojë në lehtësimin e trafikut të rënduar në aksin Palasë-Dhërmi. Tashmë, të gjithë ata që duan të vizitojnë Dhërmiun mund të përdorin këtë rrugë“, u shpreh zv/kryeministrja Balluku.
Projekti i ndërtimit të rrugës Palasë-Dhërmi parashikon edhe ndërtimin e një pedonaleje për këmbësorët, si dhe një korsie për biçikletat dhe vrapuesit.
Po kështu Balluku njoftoi se javën që vjen, do të hapet për qarkullim edhe rrethrrotullimi i TEG-ut, duke lehtësuar ndjeshëm edhe qarkullimin e mjeteve drejt Elbasanit dhe anasjelltas.
