Prokuroria e ka regjistruar humbjen e kontakteve të Ervis Martinaj me familjen si rrëmbim personi dhe mësohet se një grup i posaçëm agjentësh janë duke u marrë me çështjen.
Policia është duke kryer kërkime në zonat e Fushëkuqes, në Durrës dhe Vlorë ku mendohet se Ervis Martinaj kishte të njohur të tij dhe mendohet e strehonin.
Ishte xhaxhai i Ervis Martinaj, Faik Martinaj, ai që denoncoi se familja kishte humbur kontaktet me të shumëkërkuarin e policisë.
Në denoncimin që u bë publik disa ditë më parë xhaxhai i Martinaj tha se janë njoftuar nga një i afërm se nipi i tij ishte zhdukur. Ndërkohë xhaxhai shprehet se familja ka dyshime se Ervisit mund ti ketë ndodhur diçka e keqe nga grupe kriminale qe kërkojnë ta eliminojnë.
Gazetarja Klodiana Lala ka zbuluar se “personi që mendohet se ka informuar Faik Martinaj për humbjen e kontakteve me nipin e tij, ndodhet në Dubai dhe policia e ka të pamundur të marrë informacion për atë që ka ndodhur.
Nërkohë ka gjasa që të gjitha dosjet e rënda kriminale, ku përfshihet ngjarja e Milotit, ku mbeti i vrarë Klisman Preçi dhe u plagos rëndë Ylli Brahimi por edhe atentatit i trefishtë në Fushë-Krujë, të përfshihen në një të vetme nga SPAK, me qëllim për të mësuar se cilat janë kundërshtarët që duan ta eleminojnë të shumëkërkuarin e drejtësisë Ervis Martinaj.
Ervis Martinaj është shpallur në kërkim nga SPAK, pasi sipas dëshmisë së të penduarit të drejtësisë Nuredin Dumani kishte urdhëruar vrasjen e Endrit Dokles.
