Shoferi i kamionit në Teksas të SHBA brenda të cilit u gjetën 53 emigrantë të vdekur është shprehur se nuk e dinte që kondicioneri nuk punonte.
Homero Zamorano, 45 vjeç, u gjet i fshehur pranë kamionit të hënën, thonë zyrtarët. Ai është një nga katër personat e akuzuar, për ngjarjën.
Ky është incidenti më vdekjeprurës i trafikimit të qenieve njerëzore në historinë e SHBA, raporton BBC.
rBenda në kamion kishte edhe fëmijë, të cilët kanë mbetur të plagosur dhe ndodhen në spital. Viktimat ishin nga Meksika, Hondurasi, El Salvadori dhe Guatemala.
Në momentin që policia zbuloi viktimat brenda kamionit 45-vjeçari u tha autoriteteve se ishte një nga të mbijetuarit. Por hetimet zbuluan se ai ishte shoferi dhe akuzohet si një nga personat e përfshirë në këtë rast të kontrabandës së emigrantëve.
Ai dhe një 28-vjeçar i quajtur Christian Martinez janë akuzuar nga autoritetet amerikane se kanë komunikuar me njëri-tjetrin me mesazhe para dhe pasi kamioni me emigrantë u zbulua.
45 vjeçari u arrestua pasi në fotot e vëzhgimit dukej se ishte ai që po ngiste kamionin dhe po kalonte në një pikë kontrolli të Patrullës Kufitare të SHBA në Laredo, Teksas.
Të dy këta persona, nëse shpallen fajtorë, rrezikojnë të dënohen me vdekje. Dy persona të tjerë, meksikanë, që dyshohen të përfshirë në këtë ngjarje të rëndë, akuzohen për armëmbajtje pa leje dhe qëndrim të paligjshëm në SHBA.
N ëtotal 64 emigrantë ndodheshin gjithsej të fshehur brenda kamionit në Teksas. 53 humbën jetën, ndërsa të tjerët u dërguan në spital.
