Zërat më kritikë me Kremlinin dhe në veçanti me Presidentin rus, Vladimir Putin, shtohen me kalimin e javëve. Sportisti i fundit që u pozicionua kundër ofensivës ushtarake ruse ishte Igor Denisov.
Ish-futbollisti, i cili u tërhoq në vitin 2019 pas një karriere të gjatë në futbollin rus dhe ekipin kombëtar, ka qenë i fundit që ka dënuar veprimet e ushtrisë në territorin ukrainas.
“Kjo luftë është një katastrofë, është tmerr total”, i tha ai kanalit rus Nobel, në YouTube. Gjatë intervistës, Denisov zbuloi se ai madje i kishte shkruar Putinit me qëllim që t’i jepte fund luftës në Ukrainë.
“I kam shkruajtur që jam gati t’i gjunjëzohem, vetëm t’i jepte fund luftës”, shtoi Denisov.
I konsideruar si një nga futbollistët më të mirë rus në histori dhe një nga ikonat kryesore sportive në vend, Denisov pranoi rrezikun që merr përsipër duke u pozicionuar kundër strategjisë ushtarake të Putinit.
“Mund të më arrestojnë apo të më vrasin pas këtyre fjalëve, por unë i them gjërat ashtu siç janë”, nënvizoi më tej ish-futbollisti.
Igor Denisov bëri debutimin e tij me Zenit, një klub ku luajti deri në vitin 2013 dhe me të cilin fitoi shtatë tituj, përfshirë Kupën UEFA (Europa League aktuale) dhe Superkupën e Evropës në 2008, vit në të cilin mundi Glasgoë Rangers dhe Manchester United, respektivisht.
Pas një periudhe të shkurtër te Anzhi, mesfushori rus luajti për Dinamon e Moskës midis 2013 dhe 2017, përpara se të kalonte te Lokomotiv Moska, klubi për të cilin luajti deri në pensionimin e tij, në vitin 2019.
Me Rusinë, Denisov luajti 54 ndeshje që nga viti 2012, dhe ishte kapiten në periudhën 2012-2016.
