Kryeministri Edi Rama, në konferencën e përbashkët për shtyp me presidentin e Ukrainës, Volodymyr Zelensky, dhe kryeministrin malazez, Dritan Abazoviç tha se vendet e Ballkanit Perëndimor do të bashkojnë përpjekjet për të rindërtuar disa lagje në qytetin e shkatërruar Irpin.
Gjatë vizitë në Ukrainë, Rama pa nga afër edhe shkatërrimet në Irpin, një nga qytetet e goditura nga forcat ruse.
“Personalisht hezitoja të vija sepse përmasat e këtij tmerri janë të skajshme dhe mundësia që ka Shqipëria për të ndryshuar fatin e kësaj lufte nuk është aspak e mjaftueshme. Por në të njëjtën kohë nuk mund të mos i përgjigjesha ftesës suaj e nuk mund ta humbnim këtë moment me ju. Jam mirënjohës për mikpritjen bujare dhe për dëshirën për të ndarë me ne një pjesë mjaft të vogël të realiteti që më parë e kemi parë përmes fotove.
Jam vërtetë i lumtur që ratë dakord me propozimin tonë për të bashkuar përpjekjet e për të ndërtuar një bllok secili prej vendeve ndërtesën e tij për familjet dhe fëmijët e Irpinit. BE e shumë të tjerë janë tashmë pjesë e kësaj përpjekje por le ta bëjmë në mënyrë ballkanike pa shumë burokraci, të jemi të parët që e bëjmë këtë gjë”,-tha Rama.
