Presidenca ka sqaruar procedurat se si u shkarkua, Bajram Begaj nga posti i Shefit të Shtabit të Përgjithshëm, para se të votohej për President.
Nëpërmjet Këshilltarit për Mediat dhe Zëdhënësit të Presidentit të Republikës, Tedi Blushi, institucioni i Presidencës sqaron për mediat se kërkesa e kryeministrit për shkarkimin e Begajt është shqyrtuar nga stafi i Presidentit të Republikës në Tiranë dhe më pas i është përcjell në mënyrë elektronike presidentit Ilir Meta, i cili ndodhej në Turqi.
Presidenca thotë se forma, përmbajtja dhe ekstremitetet e dekretit të Presidentit të Republikës nuk ndryshojnë, pavarësisht vendit nga ku është bërë publik vullneti dhe nënshkruar ky akt.
Miratimi i një dekreti Presidencial si formë e shprehjes së vullnetit mund të bëhet kudo, por shqyrtimi i praktikës dhe hartimi i aktit, plotësimi i ekremiteteve, numërtimit, protokollimit, sekretimit, njehsimit, etj, janë veprime administrative që kryhen në Tiranë, në selinë e Institucionit të Presidentit të Republikës nga ku kryhet sipas ligjit dhe përcjellja zyrtare e aktit nga Sekretari i Përgjithshëm i Institucionit për zbatim tek autoritetet përgjegjëse apo kërkuese.
“Nëse ndokush dëshiron të njihet me dekretin edhe në format shkresor, mund të paraqesë një kërkesë për një kopje te njehsuar të këtij akti dhe mund ta sfidojë atë sipas dëshirës në Gjykatën Kushtetuese, Gjykatën Administrative apo në çdo organ ku ai e konsideron të aplikueshme dhe të realizueshme të drejtën e tij”,-thotë Presidenca.
Firmosja e dekretit nga ana e presidentit Ilir Meta teksa ishte në Stamboll, shkaktoi reagime në politikë, madje ish-kryeministri Sali Berisha e cilësoi si shkelje të Kushtetutës pasi është firmosur jashtë territorit të Shqipërisë./ Opinion.al
