Këtë të enjte kryeministri Edi Rama, i shoqëruar nga ministrja e Shëndetësisë, Ogerta Manastirliu, ka inspektuar ambientet e spitalit Infektiv në QSUT, ku po punohet për zgjerimin e ambienteve për përballimin e emergjencave shëndetësore.
Gjatë vizitës, Rama është shprehur se nga 1 korriku do të rriten pagat për bluzat e bardha.
“Rëndësi ka që tani i kemi të mbyllura projektet. Duhet të shikojmë atë rrugën që ndan rrugën e korpusit nga lagjja, që të jetë i mbyllur me sistemin e sigurisë dhe besoj që nuk do ketë më gjera të reja për të bërë, vetëm mirëmbajtje dhe rritje kapaciteteve që nuk mbarojnë kurrë. Duhet të bëjmë edhe një ndërhyrje tek fakulteti i mjekësisë, por është çështje tjetër kjo. Tani do rrisim edhe pagat. Në 1 korrik fillon, duam ta rrisim deri në 40 % dhe besoj do ta bëjmë, e kemi të planifikuar. Duhet që rrogat të shkojnë paralelisht me rritjen e investimeve”-tha Rama.
Projekti i rindërtimit të spitalit infektiv në QSUT parashikon sipas Manastirliut rinovim të ambienteve me 118 shtretër, si dhe dyfishim i kapaciteteve të terapisë intensive.
