Prokuroria e Elbasanit ka përfunduar hetimet dhe ka çuar për gjykim dosjen e Erjon Llapushit e Luan Dulellarit lidhur me sherrin ku mbeti i vrarë kryekamarieri Gazment Kurmaku. Në një njoftim për mediat bëhet me dije se Prokuroria e Elbasanit ka marrë të pandehur: Erjon Llapushi i hetuar me masën e sigurimit “Arrest në burg”, akuzuar për veprën penale të “Vrasjes me dashje” dhe Luan Dulellari, hetuar me masën e sigurimit “Arrest në burg”, akuzuar për veprat penale të “Moskallëzimit të krimit” dhe “Përkrahjes së autorit të krimit”.
Gazment Kurmaku, 57-vjeç u vra pas një sherri banal, për një tavolinë që ishte rezervuar, në ambientet e restorantit “Rozafa Fish” në Labinot të Elbasanit. Ai u vra nga Erjon Llapushi, 33 vjeç, një personazh i skeduar për aktivitet kriminal, dhunë dhe rrezikshmëri të lartë shoqërore.
Njoftimi i Prokurorisë Elbasan
Prokuroria pranë Gjykatës së Shkallës së Parë Elbasan njofton se ka përfunduar hetimi dhe është dërguar për gjykim procedimi penal nr.1469, për ngjarjen e ndodhur më datë 02 Tetor 2021 në një lokal të Elbasanit ku si pasojë e një sherri mbeti viktimë kryekamarieri Gazment Kurmaku.
Prokuroria e Elbasanit ka marrë të pandehur:
-Erjon Llapushi hetuar më masën e sigurimit “Arrest në burg”, akuzuar për veprën penale të “Vrasjes me dashje” parashikuar nga neni 76 i K.Penal
-Luan Dulellari, hetuar me masën e sigurimit “Arrest në burg”, akuzuar për veprat penale të “Moskallëzimit të krimit” parashikuar nga neni 300/1 i K.Penal dhe “Përkrahjes së autorit të krimit” parashikuar nga neni 302/1 i K.Penal, ku ka mbetur viktimë shtetasi Gazmend Kurmaku.
Ngjarja ka ndodhur pas një konflikti në ambientet e subjektit “Rozafa Fish” në Labinot të Elbasanit, midis disa klientëve dhe punonjësit të restorantit të quajtur Gazmend Kormaku, i cili pas një debati me autorin është goditur me grusht nga ky i fundit. Si pasojë viktima ka humbur jetën me datë 07/10/2021.
Hetimet u ndoqën nga Drejtuesi i Prokurorisë, Kreshnik Ajazi.
