Prej të enjtes së shkuar në skenën e Teatrit Eksperimental “Kujtim Spahivogli” po shfaqet tragjikomedia “Dhimbje e lehtë”.
Nën aktrimin e Genci Fuga dhe Eni Jani, kjo tragjikomedi do të vazhdojë të shfaqet edhe këtë fundjavë, në datat 5-6-7 dhe 8 maj, ora 19:00 në skenën e Teatrit Eksperimental “Kujtim Spahivogli”.
Me Eduardin dhe Florën, Genci dhe Eni sjellin sërish dramën psikologjike të këtij çifti, ëndrrat, dëshirat dhe kujtimet e të cilëve marrin 1001 trajta, prej pasigurive dhe frikërave që burrit i ndillen nga të panjohurat e jetës dhe plakja. Gjendjet e tyre emocionale do të pësojnë ulje ngritje të fuqishme. Situatat do të përmbysën e transformohen deri në minutën e fundit të kësaj tragjikomedie.
Është të qeshësh e të qash me gjithçka ndodh mes një çifti të martuar, që ndër vitet e gjata të bashkëjetesës mes tyre s’dijnë më se çfarë janë e çfarë duan.
Ai (Eduardi) është një burrë që nis të mpaket e të transformohet nga frikërat që po i sjell plakja. Ka vite që ka harruar të jetojë jashtë mureve të shtëpisë, që është ndrydhur në egoizomin e tij, ku me kalimin e kohës nuk ka pasur më vend as për gruan e tij, të bukurën Florë. Ajo është shndërruar në sytë e tij si një objekt më shumë në shtëpi.
Është i sigurtë që do ta ketë gjithmonë aty, ndaj s’bën më as më të voglën përpjekje për ta mbajtur. Derisa ajo nis të lodhet, të revoltohet, të reagojë… Derisa vjen ai momenti kur krizat e përdishme, ato të voglat e vazhdueshme si zukatja bezidsëse e një blete, shkaktojnë përmbysjen e madhe….
Biletat mund të rezervohen me një telefonatë në numrin 069 57 177 46 ose tek recepsioni i teatrit eksperimental “Kujtim Spahivogli”.
