Një ditë pas shkarkimit të kryeprokurores së Tiranës, Elisabeta Imeraj, nga detyra KLP ka caktuar edhe drejtuesin e përkohshëm të Prokurorisë së Tiranës.
Mësohet se Këshilli i Lartë i Prokurorisë ka caktuar Arens Çelën si drejtues të Prokurorisë së Tiranës.
Sipas Klan News, Arens Çela do të jetë drejtues i komanduar në Prokurorinë e Tiranës.
Arens Çela ka qenë më parë prokuror në ish-Gjykatën e Krimeve të Rënda.
Kujtojmë se Imeraj u shkarkua dje nga KPA pasin iu gjetën probleme në të 3 kriteret e vendosura.
Sipas Kolegjit të KPA-së, kryeprokurorja e Tiranës ka pasur probleme lidhur dhe me kontrollin e figurës, ndërsa ka përmendur faktin se sipas trupit gjykues, prokurorja ka mbajtur qëndrime kontradiktore lidhur me një dënim, që ish-kunati i saj ka pasur për vepra penale që e bëjnë atë person të përfshirë në krimin e organizuar. Po ashtu, sa i përket aftësive profesionale, Kolegji ka deklaruar se në një çështje hetimore ka pasur “mangësi”./Opinion.al
