Rusia po fillon fazën tjetër të një operacioni special në Ukrainë. Kështu është shprehur ministri i Jashtëm Sergei Lavrov në një intervistë për India Today, cituar nga Interfax.
Lavrov parashikoi se faza e re do të ishte një “moment i rëndësishëm” në luftë, e cila tani ka hyrë në javën e saj të tetë.
“Një fazë tjetër e këtij operacioni (në Ukrainën lindore) po fillon dhe jam i sigurt se ky do të jetë një moment shumë i rëndësishëm i gjithë këtij operacioni special”- tha ministri i Jashtëm rus.
Rusia ka vendosur trupa në lindje për një ofensivë tokësore në dy provinca të njohura si Donbas. Moska gjithashtu ka nisur sulme në distanca të gjata në objektiva të tjerë që përfshijnë edhe kryeqytetin.
Mbrëmjen e djeshme, presidenti ukrainas Volodymyr Zelensky tha se forcat ruse ishin përpjekur të kalonin përgjatë pothuajse të gjithë vijës së frontit në Ukrainën lindore për atë që ai e quajti “Beteja e Donbasit”.
Megjithatë, shefi i shtabit të Zelensky, Andriy Yermak, i siguroi ukrainasit që forcat e tyre mund të ndalonin ofensivën. “Besoni në ushtrinë tonë, është shumë e fortë”, tha ai.
