Ish-kryeministri Sali Berisha, nga foltorja e Kuvendit, ka deklaruar se shqiptarët kanë humbur të drejtën për të patur gjykim të drejtë.
Teksa deklaroi votën kundër vettingut, Berisha tha se Shqipëria u bllokua për integrimin 3 vite për shkak të mungesës së gjykatave.
Më tej ai theksoi se janë me mijëra dosje në gjykata që qytetarët presin vendim, e shumë shkojnë në botën tjetër pa marrë drejtësi.
“Në këtë sallë dhe jashtë saj kam paralajmëruar Edi Ramën për këtë katastrofë. Është përpjeklur që të lajë duar për çdo gjë duke fajësuar të huajt. Kam mbrojtur interesin e qytetarëve. Përgjegjësia për këtë reformë është e Edi Ramës dhe grupit që e mbështeti. U përzgjodh me qëllim përdorimi i Vettingut me metodën lart-poshtë. Është e njohur si metodë destruktive, shkatërrimtare. Një kryeministër që pranon që vendi i tij të mbetet pa shtet ligjor.
U mbajt Sokol Sadushi i cili kishte blerë apartament nga një person që nuk dihet se ku i kishte gjetur paratë. U mbajt Sokol Sadushi që deklaronte dhuratën 20 mijë euro të gjyshes për fëmijët. Kur një tjetër gjyqtare thoshte se babai i dha 20 mijë euro dhe i kishte dhënë nga rroga nuk besohej se ishte e djathtë. Një tjetër u përzu se nuk kishte deklaruar një gasoniere nga viti 1994.
Pasojat e vettingut janë katastrofale. Shqiptarët e kanë humbur të drejtën të kenë një proces gjyqësor të drejtë. Shqipëria u bllokua për integrimin 3 vite për shkak të mungesës së gjykatave. Janë me mijëra dosje në gjykata që qytetarët presin vendim, shumë shkojnë në botën tjetër pa marrë drejtësi. Qytetarë që sjeni me socialistët, dosjet tuaja në gjykata i shqyrton ish-gruaja e Edi Ramës”, tha Berisha.
Ndërkohë Felaj i tha Berishës se duhej të ulej tashmë pasi kishte përfunduar minutazhi i lejuar për çdo deputet.
Më pas deputeti Flamur Noka nga vendi me duar bënte me shenjë që Berisha të merrte edhe kohën e tij. Felaj iu përgjigje se kjo nuk lejohet nga rregullorja.
