Lideri i grupit militant, Shteti Islamik, i vrarë në një sulm të Shteteve të Bashkuara të Amerikës në veriperëndim të Sirisë, ishte kryesisht një mister, me pothuajse asnjë fotografi të publikuar. Ai nuk u shfaq kurrë në publik ose në videot e këtij grupi.
Abu Ibrahim al-Hashimi al-Qurayshi gjeti vdekjen në të njëjtën provincë, të kontrolluar nga rebelët, ku paraardhësi i tij, Abu Bakr al-Baghdadi, u vra nga amerikanët pak më shumë se dy vite më parë. Vrasja e tij vjen në një kohë kur militantët e ISIS-it, pas disa vitesh sulme të nivelit të ulët, kanë filluar të kryenin sulme më të guximshme dhe të profilit më të lartë. Analistët thonë se vdekja e Al-Qurayshit do të prishë punë vetëm për momentin, por jo në plane afatgjatë.
Emri i tij i vërtetë ishte Amir Mohammed Saeed Abdul-Rahman al-Mawla, një irakian në mesin e të dyzetave. Autoritetet amerikane kanë bërë të ditur se Al-Qurayshi drejtonte rrëmbimin dhe trafikimin e anëtarëve të pakicës fetare jazidi të Irakut dhe se ai ka mbikëqyrur operacionet globale të grupit. Mijëra burra jazidi u vranë nga grupi dhe mijëra gra u morën si skllave në atë që grupet e të drejtave të njeriut thonë se përbën gjenocid.
Më 18 Mars, 2020, Departamenti amerikan i Shtetit e etiketoi Al-Qurayshin si terrorist global. Disa muaj më vonë, SHBA-ja dyfishoi shpërblimin e saj në 10 milionë Dollarë për informacionin që do të çonte në identifikimin ose vendndodhjen e tij.
Klan News
