Jetët e personave të famshëm janë gjithnjë në qendër të vëmendjes teksa kjo e fundit prek automatikisht edhe fëmijët e tyre, duke mos iu kursyer as jetën personale. Xhonatan Islami dhe Aleksia Peleshi, të ftuar në panelin e pasdites në “Rudina” në Tv Klan, nuk hezitojnë të tregohen të hapur për impaktin e famës së prindërve në lidhjet e tyre.
Xhonatani, djali i Alket Islamit, trajnerit të kombëtares së aeronautikës thotë se e ka pasur të lehtë sepse lidhja e tij ka qenë publike që herët. Aleksia, vajza e ministrit të Mbrojtjes, Niko Peleshi, shpreh të kundërtën, madje edhe pendohet pak.
Aleksia Peleshi: Ashtu si dhe Xhonatani edhe unë e kam pasur gjithmonë mbështetjen dhe mirëkuptimin e babit për sa i përket lidhjes. Sigurisht më ka sugjeruar që t’i mbaj gjërat sa më private, pavarësisht se unë nuk e kam ndjekur këtë këshillë dhe kam bërë gabim.
Rudina Magjistari: Pse mendon se ke bërë gabim?
Aleksia Peleshi: Po sepse në momentin që i thua gjërat me aq pastërti, me aq sinqeritet, e bën veten si të thuash si mish për top, je shumë e atakueshme nga publiku, aq më tepër që njerëzit i keqintepretojnë gjërat. Babi, mbaj mend na ka thënë, “ça na bëre, ngelën duke më thënë njerëzit të trashëgohet çupa”.
Rudina Magjistari: Dhe ti çfarë i thua?
Aleksia Peleshi: “Faleminderit” i them, thuaju.
Rudina Magjistari: Pra ti do të doje të vinin urime të tilla?
Aleksia Peleshi: Nuk flas më./Tv Klan
