Ish-kryeministri Sali Berisha ka marrë sërish fjalën në Kuvend, ku ka vijuar akuzat ndaj qeverisë. Sipas Berishës, kompania Emaar Group që do të ndërtonte Portin e Durrësit është larguar dhe tani do të jenë disa kompani shqiptare offshore që do të investojnë 2 miliardë Euro.
Ndër të tjera ai tha se afera e Portit të Durrësit është afera më e madhe korruptive në Europë
“Theksoj se çdo marrëveshje e kësaj narkoqeverie për luftën kundër krimit është fund e krye një falsitet, një formalitet mbasi Shqipëria është vendi ku krimi i organizuar e ka kthyer në qendrën operacionale dhe janë të lidhur me Ramën. Kompania EMAAR u zhduk, por kanë dalë tani në dritë disa kompani offshore në lidhje me kreun e Meduzës dhe pengun e tij për pastrimin e 2 miliardë eurove. U them këtu dhe do ju njoftoj në seancat e tjera, se afera e Portit të Durrësit është afera më e madhe korruptive në Europë”-tha Berisha.
Ministra e Shtetit për Mardhëniet me Parlamentin, Elisa Spiropali ka replikuar me ish-kryeministrin Sali Berisha, ku u shpreh se halli i tij shtë të rrëzojë birin e tij politik Bashën.
“Ju po i bini derës tonë që të dëgjoi brava juaj. Por as dera jonë nuk ka ndërmend të tundet dhe as brava e tyre nuk ka ndërmend të shembet. Doli më e fortë sesa e kishit menduar. Por për t’iu kthyer asaj që thatë dhe se me 7 mars, biri juaj do thotë, bandat e Saliut, Metës e Ramës vodhën zgjedhjet, por beteja jonë sapo ka filluar. Besoj është e kotë t’i paraprini, lëre të bëjë fjalimin e tij sepse ngjan si dy pika uji. Të paktën ndryshoni ju se ai nuk ndryshon. Ai ka mësuar kasetën dhe ndryshoni ju që të kemi shpëtim. Meqë në zgjedhjet e pjesshme jeni ndarë në shtëpi të ndryshme, më vjen në mendje një shprehje “Eh moj kasolle, ku na mblodhe” dhe jeni mbledhur të gjithë. 5 herë a 7 herë rresht ka humbur biri juaj zgjedhjet. Sërish presim këngën e himnit me zërin e stonuar”-tha Spiropali.
