Kreu i PD, Lulzim Basha ka mbajtur fjalën e tij në Kuvendin e Shqipërisë këtë të enjte. Basha e nisi fjalimin e tij duke pyetur ku ndodhet kryeministri Edi Rama, ndërsa shtoi se para dy ditësh kreu i qeverisë ka bërë një udhëtim me charter privat në një vend te Europës duke harxhuar vetëm karburant 120 apo 150 mijë euro.
“Dua ta nis me pyetje retorike, si ka mundësi që në seancën e javës, të ngarkuar me vendime të sjella nga vetë qeveria, në një javë të mbushur me skandale, që do të trondisin e do të rrëzonin qeverinë normale në vende normale, këtu nuk ndodhet as 1/3 e deputetëve? Ku është kryeministri? E dimë që para dy ditësh shkoi e erdhi me charter privat, duke harxhuar 120 apo 150 mijë euro karburant. Shkon e vjen me një charter luksoz, ku vetëm karburanti kushton minimumi 150 mijë euro. Dhe kur vjen puna për t’u përballur me shqiptarët, nuk e dimë ku është. Me cilin vend të Evropës, mos të them të botës, në 2022, mungon transparenca minimale për shpenzimet marramendëse qeveritare të një populli që është në varfëri të thellë. Në cilin vend të botës kryeministri ka charter privat, shkon drejt kryeqyteteve luksoze të Evropës, ndërkohë që qeveria e tij pa asnjë mandat dhe në kundërshtim me ligjin shemb catitë e banorëve të kryeqytetit, sic ndodh te “5 Maji”, ku pjesa dërrmuese e banorëve janë në gjendje lufte, sikur i ka bombarduar një armik, një armiku i padukshëm, por i tmerrshëm, i korrupsionit qeveritar.”, tha Basha./Opinion.al
