Administratori i selisë së Partisë Demokratike, Albert Avdyli ka njoftuar zyrtarisht se për protestën e 8 janarit dhe atë çfarë ndodhi atë ditë do të njoftojë institucionet ligjzbatuese dhe partnerët ndërkombëtarë.
Ai njofton se listën e atyre që organizuan, nxitën, përgatitën dhe ekzekutuan dhunën më 8 janar do ia dorëzojë institucioneve të sipërpërmendura.
Avdyli shprehet se skenari ishte i parapërgatitur duke rrezikuar jetën e demokratëve si brenda, ashtu dhe jashtë selisë, ndërkohë që organizatorët sipas tij në asnjë çast nuk ndalën thirrjet për gjak.
Administratori thekson gjithashtu se PD do të marrë çdo masë shtesë sigurie të nevojshme dhe çdo tentativë për të sulmuar apo dhunuar sërish do të marrë përgjigje ligjore.
“8 janari ishte një ditë e keqe për demokratët!
Më 8 janar një skenar dhune i parapërgatitur u zbatua ndaj Partisë Demokratike, duke rrezikuar jetën e dhjetëra demokratëve brenda dhe jashtë selisë. Jo vetëm që urdhëruesit, organizuesit dhe ekzekutorët nuk u distancuan nga dhuna, por rinisën në mënyrë të papërgjegjshme thirrjet për më shumë dhunë dhe për gjak.
PD nuk mundet kurrë të shndërrohet në arenën e përplasjes mes demokratëve.
PD është distancuar dhe distancohet nga dhuna. Për ne, asgjë nuk vlen më shumë se jeta e qytetarëve, jeta e demokratëve, që më 8 janar u perdorën si mish per top nga njeriu që i kanë shërbyer në 30 vite. Të zëvendësosh 44 mijë “anëtarë” të pretenduar partie, me 44 mijë copa betoni, gurë dhe hekura që hidhen mbi kokat e demokratëve që janë brenda selisë, është tentativë për t’iu imponuar shumicës me dhunë dhe mashtrime.
E dhimbshme ta them, por pas tentativës për të vrarë demokratët, Sali Berisha dhe çdokush tjetër që zbatoi apo frymëzoi dhunën ndaj PD dhe demokratëve, kanë ndërprerë çdo marrëdhënie me partinë dhe institucionin. Çdo tentativë e tyre për të sulmuar apo dhunuar Partinë Demokratike do të marrë përgjigje ligjore.
Tentativat e tyre për dhunë dhe gjak do të dështojnë, sepse, siç u vërtetua më 8 janar, dhuna dhe gjuha e dhunës është e shkuara dhe jo e ardhmja e kësaj partie. PD do të njoftojë zyrtarisht institucionet ligjzbatuese të vendit dhe partnerët nderkombëtarë për listën e plotë të atyre që organizuan, nxitën, përgatitën dhe ekzekutuan dhunën mbi demokratët, të cilët nuk i lidh më asgjë me selinë e PD dhe me demokratët.
Pas dhunës se 8 janarit dhe përpjekjeve të vazhduara për të dhunuar dhe dëmtuar selinë e PD, të cilat kanë edhe kosto financiare, PD do të marrë çdo masë shtesë sigurie të nevojshme.
PD është e hapur vetëm për debate, diskutime dhe mendim ndryshe, jo për akte dhune që tentojnë të zëvendësojnë shumicën legjitime të demokratëve”-thuhet në njoftimin e bërë nga administratori i PD./Opinion.al
