Pasi Partia Demokratike akuzoi ish-kryeministrin Sali Berisha se po përgatit një sulm ndaj selisë blu, ka ardhur edhe reagimi i Komisionit të Rithemelimit të PD.
Përmes një deklarate për mediat, Komisioni i Rithemelimit të PD shkruan se Lulzim Basha e ka kuptuar se po i afrohet fundi.
Ndër të tjera në deklaratë thuhet se Basha po flet me gjuhën e Edi Ramës, ndërsa shton se “deputeti brava” është i vetmi politikan i akuzuar zyrtarisht për pastrim parash.
“Deputeti Brava e kupton që numërimi së prapthi për të është afër fundit. I shkarkuar, i braktisur dhe i përbuzur nga demokratët, deklaratat e tij ngjasojnë gjithnjë e më shumë si dy pika uji me ato të deputetit Balla që është dhe interlokutori i tij në PS pas shkarkimit. Sot Lulzim Brava flet për Sali Berishën me gjuhën e langojve të Edi Ramës sepse në fakt ky është misioni i fundit që i ka mbetur për të bërë!
Por në çdo rast ai mbetet një version qesharak i pengmarrësit të tij. Në 8 vjet ndërkohë që Lulzim Brava shkelte mbi sakrificat e demokrateve për pazare me Ramën, shqiptarët nuk kanë dëgjuar apo parë askënd të luftojë dhe denoncojë narkoshtetin, narkotrafikantët dhe krimin e organizuar me shumë se Sali Berisha!
Akoma më qesharake vjen akuza për pastrim parash kur në fakt i vetmi politikan i akuzuar zyrtarisht për pastrim parash është vetë Lulzim Brava për pagesa deri në 800 mijë dollarë! Është kjo dosje bashkë me “Toyota Yaris” të cilët e kanë lënë peng të Edi Ramës! Është mega afera e Portit të Durrësit pazar-karremi që e bën t’i kundërvihet vullnetit të demokratëve.
Sa për takimin e shoqatës Basha- Bardhi, nuk ka Gaztor që mund të shpjegojë se si në një sallë me 1950 karrige qenkan ulur 5004 delegatë! Ne fakt kjo është dhe një nga arsyet përse shqiptarët nuk kanë asnjë besim që votën e tyre të lirë mund ta garantojë dikush që gënjen dhe manipulon me zë dhe figure votën e demokratëve!
Por në pak ditë Shqipëria dhe Partia Demokratike do të ndahen nga opozita e dështuar e korruptuar dhe e kapur e Lulzim Bravës! Nuk ka bunker, brave apo shul qe do mund te pengojë vullnetin e demokratëve për ta çliruar opozitën nga pazaret dhe pengjet!”-thuhet në deklaratën e Komisionit të Rithemelimit./Opinion.al
