Banorët e Lagjes “5 Maji” kanë ngritur shqetësime lidhur me prishjen e banesave të tyre dhe mënyrën se si do të kompensohen nga autoritetet lidhur me këtë proces. Gjatë një takimi me nënkryetarin e PD Alfred Rushaj, ata janë shprehur se asnjë nga institucionet nuk po ju jep shpjegime, ndërsa kanë hedhur akuza ndaj kryebashkiakut Veliaj dhe Kryeministrit Rama: “Këta i kanë bllokuar legalizimet, se kanë interesat e veta me vjedhë pronat tona”. “Erion Veliaj dhe Edi Rama të vijnë të japin llogari. Çfarë duhet të na bëjnë tjetër, veçse të na vrasin.“
Banorët mohuan deklaratat e bashkisë së shumica e tyre kanë firmosur për prishjen e shtëpive, duke e konsideruar qendrimin si përçarës dhe kundër interesit të tyre.
“Të gjithë banorët janë pajisur me mandatpagesë deri më qershor 2013, që do të thotë se u ka lindur e drejta e legalizimit, e cila nuk humbet, edhe nëse pagesa nuk kryhet. Nuk na japin certifikatat e pronësisë, që të mos na paguajnë sipas ligjit.” – tha një banor.
“Kjo nuk është qeveri, është sadizëm. Dalin pleq e plaka e kalamaj në mëshirë të fatit duke patur shtëpitë e veta. Kjo është katastrofë”, u shpreh një banor tjetër.
Nënkryetari i PD Alfred Rushaj deklaroi se qeveria ka shkelur ligjin dhe kushtetutën, duke u prishur shtëpitë pa shpërblim paraprak. Ai tha se qeveria po tallët me rreth 5 mijë banorë të zonës me kontratat e qerasë. “Kontrata është një turp. Aty thuhet po ta prish shtëpinë dhe të premtoj se pak më vonë do të të them, nëse do të marrësh apo jo shtepi, kur, ku dhe si do ta marrësh. Duhet lexuar kontrata për të parë sesi qeveria tallet me njerëzit.”- tha Rushaj./Opinion.al
