Është zbuluar imazhi i shqiptarit 38-vjeçar që mbeti i vrarë nga pronari i vilës, gjatë një tentative grabitjeje. Arbër Xheleshi u vra mbrëmjen e 25 Tetorit nga biznesmeni italian Sandro Fiorelli, pasi po tentonte të vidhte në vilën e këtij të fundit, në Santropadre të Frosinones.
Sipas mediave italiane, 38-vjeçari bashkë me disa persona të tjerë kanë hyrë në vilën e biznesmenit, por ky i fundit i ka ndjerë hajdutët dhe ka dalë për të kontrolluar. Pasi e kanë kuptuar që janë zbuluar, hajdutët janë larguar me vrap, ndërsa shqiptari i është afruar pronarit të vilës, duke i drejtuar një armë.
Menjëherë pas këtij veprimi ka ardhur edhe reagimi i biznesmenit italian, i cili e ka qëlluar 38-vjeçarin shqiptar me armë gjahu, duke e lënë të vdekur në vend.
Viktimës iu gjetën disa dokumente romune me emrin Mirel Joaca Bine. Pasi konstatuan se kishin të bënin me dokumente false, policia i mori shenjat e gishtave duke verifikuar të dhënat me sistemin. Nga aty u zbulua se nuk bëhej fjalë për një rumun, por për një shqiptar, i cili rezultonte edhe më herët i regjistruar për krime të ngjashme në të dhënat e policisë./Opinion.al
