Kryeministri maqedonas Zoran Zaev nuk ka pranuar dorëheqjen e Ministrit të Shëndetësisë Venko Filipçe dhe zëvendës ministrit, Ilir Hasani, të cilët kërkonin largimin nga detyra pas ngjarjes së rëndë të ndodhur në Tetovë, ku ra zjarr në spitalin Covid dhe si pasojë humbën jetën 12 pacientë dhe dy familjarë të tyre.
Kjo deklaratë e Zaev vjen pasi Prokuroria Themelore në Tetovë pranoi raportin e ekspertizës në të cilin konstatohej se zjarri në spitalin Covid ishte shkaktuar nga një qark i shkurtër elektrik në një prizë zgjatuese..
“Në bazë të këtyre njoftimeve dhe atyre të mëparshme, dua ta informoj publikun se nuk ka arsye për të kërkuar përgjegjësi politike apo menaxheriale tek ministri Venko Filipçe dhe te zëvendës ministri i Shëndetësisë Ilir Hasani”, u shpreh kryeministri Zaev. Më tej ai shtoi se “për gabimet eventuale të shkaktuara nga faktori njeri do të deklarohen organet kompetente”.
Ndërsa kreu i qeverisë në Shkup thekson se nuk do të lejojë politizimin e tragjedisë në spitalin e Tetovës, opozita, si ajo maqedonase edhe ajo shqiptare për disa javë kanë fajësuar qeverinë dhe sidomos kanë kërkuar përgjegjësi nga Ministri i Shëndetësisë Venko Filipçe për “keqmenaxhimin dhe shkatërrimin e sistemit shëndetësor”.
Tragjedia e 8 shtatorit në spitalin e Tetovës u mori jetën 14 personave, 12 prej të cilëve ishin pacientë të prekur me COVID-19 që po trajtoheshin në këtë qendër dhe dy të tjerë familjarë të tyre./Opinion.al
