Një dëshmitar i ngjarjes së ndodhur mbrëmjen e djeshme në Tetovë, ku ra zjarri në një spital Covid ka thënë se një ngjarje e tillë nuk është parë në 40 vite në historinë e qytetit.
Ai ka thënë se kanë shpëtuar ata që kanë pasur fuqi të dalin pasi shumica e pacientëve kanë qenë në terapi intensive.
“Mbrëmë kemi parë një tragjedi të cilën nuk e kemi parë që 40 vite në këtë lagje. Jetoj këtu afër t’ju them të drejtën jam pa gjumë, sikurse e dhe ju, me siguri gjithë natën keni bërë hulumtime. Kjo si ngjarje që kam parë unë, ka ndodhur diku ora 21:04 ose 21:05 minuta, në këtë moment dikush, ka njoftuar organet kompetente, zjarrfikësit, policinë. Në ora 21:10 minuta kam qenë këtu afër diku, zjarrfikësit ishin në vendngjarje, aq sa kanë mundur ata ta bëjnë punën e vete… Kemi ndihmuar familjarët me ujë me diçka, u munduam që të ndihmojmë të shpëtojmë, por ata që kanë shpëtuar nga brenda kanë ndihmuar veten, kanë pas fuqi dhe kanë dalë, sepse e dimë që kanë qenë në terapi intensive”, u shpreh një dëshmitar okularë.
Ndërkohë një tjetër dëshmitar hedh dyshime se zjarri mund të ketë qenë i qëllimshëm. “Jam jashtëzakonisht i shqetësuar, kjo nuk përshkruhet me fjalë, mendoj mos është e qëllimshme. Në rast se është e qëllimshme, nuk është e njerëzishme… Se njëherë gypat i prenë për aspiratorët, e tash kjo e dyta…”, u shpreh një tjetër dëshmitarë.
Të tjerë persona që kanë qenë të pranishëm në vendngjarje shprehen se ka pasur britma të mëdha njerëzish, ndërsa shtojnë se zjarrëfikset kanë mbërritur pas 10 minutave.
“Isha brenda në oborr. Dëgjuam disa britma njerëzish, çfarë ishte…Nuk i dhashë rëndësi, thashë fëmijët janë. Kur pas 10 minutave dëgjova se është djegur spitali. Zjarr i madh. Britma të mëdha kanë qenë, tragjedi. Pas 10 minutave a kishte vetura të zjarrfikësve? Po po kishte”, thotë një qytetarë i Tetovës.
“Me sy kur erdha unë vetëm flakën e pashë, tymin. Prej nga ura poshtë e pash tymin. Dmth shumë tym, shumë i lartë, dmth edhe era vinte deri poshtë. 30 metra lartë zjarri. Katastrofë ka qenë, ulërimë e madhe pikëllim i madh”, tha një dëshmitar.
