Kryeministri Edi Rama ka vizituar këtë pasdite emigrantët afganë, që mbërritën në Shqipëri në orët e para të mëngjesit të sotëm.
Gjatë vizitës së tij kryeministri Rama ka zhvilluar diskutime me afganët e ardhur në vendin tonë mbi situatën dhe mënyrën si janë gjendur këtu, si dhe ju ka dhuruar fëmijëve disa lodra.
Pjesë nga diskutimet:
Afgania: Dua t’iu falënderoj për mikpritjen. E di që nuk është e lehtë të strehosh kaq shumë njerëz krejt papritur, por kolegët tuaj kanë bërë më të mirën.
Rama: Kemi qenë në këtë pozitë, e dimë çfarë është. Çdo gjë është në rregull këtu?
Afgania: Po, në rregull. Shumë faleminderit. Kanë qenë të gjithë shumë të gjindshëm, kanë bërë maksimumin. Nuk ka qenë e lehtë, për të qenë të ndershëm, duket ende si një makth nga i cili do të zgjohemi, por realiteti është ky që është për fat të keq. Duket si të vish nga ferri në parajsë, ka qenë shumë e vështirë për të gjithë.
Rama: Kemi sjellë disa gjëra për fëmijët. (Shpërndan dhuratat për fëmijët)
Afgania: Faleminderit shumë kryeministër. Për çdo gjë jemi këtu, për çdo gjë që të keni nevojë. Na keni mbështetur shumë, po i bëni gjërat shumë të lehta për ne këtu.
Rama: Kemi qenë në këtë situatë 30 vite më parë.
