Pesë persona janë vënë në pranga në orët e fundit nga policia e Tiranës, mes të cilëve edhe një grua.
Policia bën me dije se është arrestuar në flagrancë shtetasi me inicialet A. V., 45 vjeç, pasi në kundërshtim me vendimin e Gjykatës, ka ushtruar dhunë fizike ndaj ish-bashkëshortes së tij, e cila ka qenë e pajisur me urdhër-mbrojtjeje.
Po ashtu uniformat blu ndaluan J. F., 44 vjeç, i shpallur në kërkim për veprën penale “Vjedhja” e kryer në bashkëpunim.
Ndërsa K. K., 35 vjeçe dhe S. R., 33 vjeç, u vunë në pranga pasi në lokalin e marrë me qira nga shtetasja K. K., u konstatua shtetasi S. R., duke organizuar lojra të paligjshme të fatit.
Specialistët e Qarkullimit Rrugor bënë arrestimin në flagrancë të shtetasit R. L., 19 vjeç, pasi u kap duke drejtuar mjetin pa lejen përkatëse.
Materialet u referuan në Prokurorinë pranë Gjykatës së Shkallës së Parë Tiranë, për veprime të mëtejshme.
