Mbërrijnë në Shqipëri edhe 25 mijë doza të vaksinës ruse ‘Sputnik V’.
Lajmi bëhet i ditur nga vetë ministrja Ogerta Manastirliu nëpërmjet një postimi në rrjetet sociale. Sipas saj deri më tani ka shkuar në 936 mijë doza gjithsej të vaksinave anti-Covid të mbërritura në vendin tonë.
“Me ardhjen e 25 mijë vaksinave Sputnik ne arrijmë në totalin e vaksianve të mbërritura mbi 936 mijë vaksina nga kontratat tashmë të lidhura nga qeveria shqiptare. 823 mijë vaksina janë administruar në total përsa i përket grupeve të popullatës, por gjithashtu edhe grupeve të riskuara, në bazë të planit tonë të kombinuar të vaksnimit”, tha Manastirliu.
Ndër të tjera, Manastirliu njofton se objektivi është që brenda muajit qershor duhet të arrihen 1 milion vaksinime.
“Jemi gati për të ulur fashën e vaksinimit, duke filluar nga plus 59, 58, 57 vjeç. Ftojmë të gjithë qytetarët të vaksinohen. Ne do të vijojmë me të gjithë planin kombëtar të vaksinimit. Objektivi ynë është që të arrijmë në 1 milion vaksinime brenda muajit qershor”, tha Manastirliu.
Ndërkohë kujtojmë se prej fillimit të procesit të vaksinimit janë kryer në total 823,053 doza të vaksinës antiCOVID19 në Shqipëri.
