Kryetari i Partisë Demokratike, Lulzim Basha, ka reaguar në rrjetet sociale pas deklaratave të ish-presidentit Bujar Nishani, se ai e dinte se Berisha ishte shpallur ‘non grata’ në SHBA.
Basha i hedh poshtë këto deklarata të cilat i ka konsideruar shpifje. Më tej ai thotë se inati dhe mëllefi personal e ka një limit teksa thekson se këto shpifje i shërbejnë vetëm atyre që bëjnë gjithçka për të përçarë PD-në.
“E kam nisur fushatën për zgjedhjet brenda partisë me bindjen se nga kjo garë duhet të dalim më të fortë dhe më të bashkuar. Kam refuzuar reagimet që nxisin përçarje edhe pse çdo ditë ndaj meje janë hedhur sulme personale dhe politike të pavërteta dhe të padrejta. Por çdo gjë e ka një limit. Ndaj sot hedh poshtë me neveri shpifjen e ulët të Bujar Nishanit. Inati e mllefi personal e ka një limit. Por sot ai limit është kaluar, sepse lidhet me një çështje që ka prekur thellë jo një individ, jo Sali Berishën por gjithë partinë tonë. Këto shpifje të ulëta i shërbejnë vetëm atyre që bëjnë gjithçka të përçajnë Partinë Demokratike. Dhe unë këtë nuk do ta lejoj”./Opinion.al
