Partia Demokratike ka reaguar pas deklaratave të kryeministrit Edi Rama për mitingjet e krydemokratit Lulzim Basha, për të cilat tha se, teksa PS vaksinon qytetarët, PD grumbullon njerëzit duke u bërë kështu rrezik për përhapjen e COVID-19.
Në reagimin e PD, thuhet se Rama ka dështuar në 8 vite qeverisje dhe për të mbuluar dështimet sulmon opozitën. Ndër të tjera shkruhet; “shqiptarët duhet të paguajnë 4560 lekë të reja nga xhepi, këtë herë për shkak të arrogancës së Edi Ramës”.
Më tej në këtë reagim thuhet se në zgjedhjet e 25 prillit Rama do humbas dhe Shqipëria do fitojë.
REAGIM I PARTISË DEMOKRATIKE
Edhe në ditën kur i duhet të përballet me dështimin e radhës, Rama nuk bën gjë tjetër vetëm se sulmon PD dhe opozitën.
Shqipëria ngeli në baltë me Ramën për 8 vjet- ky është fakt, sikundër mbetet po fakt që shqiptarët duhet të paguajnë 4560 lekë të reja nga xhepi, këtë herë për shkak të arrogancës së Edi Ramës
Është koha për ndryshim, që Shqipëria të ketë një qeverisje të përgjegjshme. Këtë do ta vendosin shqiptarët me votën e tyre në 25 prill. Ditën kur Rama do të humbë dhe Shqipëria do të fitojë.
