Është shtyrë për ditën e nesërme vendimi për miratimin e fletës së votimit për zgjedhjet elektorale të 25 prillit.
Bëhet me dije se në mbledhjen e sotme të Komisionit Rregullator, kreu i KQZ, Ilirjan Celibashi paraqiti tre variante, por palët u ndanë për kompetencat, teksa prisnin gjitashtu edhe nga kryekomisioneri një variant, që më pas ta kalonin ose ta rrëzonin.
Kjo ka qenë edhe arsyeja që Celibashi u tërhoq për të risjellë një tjetër propozim.
U njoftua se mbledhja e radhës do të zhvillohet nesër, ndërkohë që sot nuk është marrë asnjë vendim përfundimtar, teksa takimi u shoqërua edhe me tension dhe diskutime.
Diskutimet në mbledhjen e Komisionit Rregullator
Ilirjan Celibashi: Ju jam sjellë tre variante. Dy me emra kandidatësh dhe një ku kandidatët përfaqësohen me numra. Ju takon juve të vendosni.
Eridjan Salianji, PS: Për këtë gjë të mos vendosë Rregullatori, duhet të vendosë vetë kryekomisioneri Celibashi. Nuk është kompetencë e juaja. Të pushojë mbledhja.
Helga Vukaj, anëtare e Rregullatorit (e propozuar nga PD): Është kompetencë e Rregullatorit. Komisioneri duhet të na sillte një propozim të vetëm, jo tre variante. T’i lëmë kohë për të na sjellë një version përfundimtar.
Shqiptarët kanë votuar në sondazhin e KQZ se kush është fleta më e përshtatshme prej tyre. Njëra ka marrë 79% të votave. Mund të ishte një orientim i mirë.
Iv Kaso, PD: Kthejani komisionerit për saktësim aktin. Të jetë i saktë dhe i qartë akti.
Muharrem Çakaj, anëtar i Rregullatorit (propozuar nga LSI): PS është njohur me materialin, dhe nuk ka pasur asnjë pretendim deri tani. Komisioni Rregullator i ka këto të drejta. (Të miratojë fletën e votimit). Celibashi të na sjellë një model konkret flete votimi, në mënyrë që ne ta miratojmë ose ta rrëzojmë. I japim kohë më shumë nëse atij i duhet për të na sjellë një variant konkret.
Ervin Salianji, PS: Nuk dua të shtyhet mbledhja. Çohuni ju nga tavolina, të ulet Celibashi aty dhe të miratojmë po sot fletën e votimit.
Helga Vukaj: Celibashi është kosheint dhe i vetëdijshëm se ne jemi kompetentë për të miratuar fletën e votimit. Ai ndaj na e ka sjellë neve në tryezë.
Ilirjan Celibashi: Unë e kam shprehur çështjen e kompetencës. E kam sjellë ta shqyrtojë Rregullatori. Le të marrim kohë sic tha përfaqësuesi i PD, ta saktësoj unë aktin, do ta risjell më një propozim konkret se si e konsideroj unë fletën e votimit, pastaj ju vazhdoni me debatin nëse e keni ose jo kompentencë. E tërheq këtë akt me tre variante, dhe jua sjell me një.
Ilirjan Celibashi: Aktin e tërheq për ta sjellë me një propozim konkret si do të jetë përmbajtja e fletës së votimit. Kjo nuk i përjashton variantet, që komisioneri ka bërë me faktorë të tjerë apo veçmas. Riparaqitja do të jetë jo më vonë së 24 orë nga ky moment./Opinion.al
