Komiteti i Ekspertëve në një dalje publike ka rikonfirmuar sot se mësimi në shkollat e qyteteve të cilat kanë rrezikshmëri më të lartë ndaj infeksionit do të vijojë online.
Ndërkaq është duke funksionuar edhe mësimi i kombinuar në të gjitha shkollat e vendit.
Lidhur me këtë vendim ka reaguar edhe Ministrja e Arsimit Evis Kushi, e cila ka apeluar gjithashtu edhe zbatimin rigoroz të masave anti-COVID.
Ministrja e Arsimit Evis Kushi ka bërë apel mbi ruajtjen e rigorozitetit dhe motivimit për mësimin “online” në shkollat e mesme të qyteteve me risk të lartë.
“Nisur edhe nga sugjerimi më i fundit i Komitetit Teknik të Ekspertëve për mbajtjen në fuqi të masave të dy javëve të fundit, ku shkollat e mesme në qytetet me risk të lartë do të vazhdojnë mësimin “online”, bëj thirrje që të gjithë të jemi sa më rigorozë dhe të motivuar për të ndjekur siç duhet procesin mësimor nëpërmjet kanaleve të ndryshme, si: “RTSH Shkollë”, platforma “Akademi.al” dhe adresa “Youtube” e MASR” – shprehet Ministrja Kushi.
Në fund, ajo bën apel për secilin rreth respektimit të masave anti-COVID:
“Kohët e vështira kërkojnë detyrimisht sakrifica të mëdha! Mbi të gjitha, angazhim maksimal dhe përgjegjësi të shtuar qytetare! Prandaj, ju lutem të gjithëve, të vazhdojmë të jemi shumë vigjilentë e të kujdesshëm në respektimin e masave anti-COVID, si mënyra e duhur për të përballuar dhe kapërcyer me sukses situatën e vështirë që po kalojmë. Bashkë ia dalim!” – mbyll publikimin e saj, Ministrja e Arsimit Evis Kushi.
Kujtojm se prej disa ditësh Kushi ka publikuar se është infektuar nga COVID-19, teksa punën e vijon nga shtëpia ku edhe është karantinuar./Opinion.al
